top of page
Typography Design - 堅毅的物種
新界人嘅一日，永遠都早啲開始，夜啲結束。
1／係咪有牛架？
「係呀，好多㗎！」我地咪果隻牛囉！如果我係僱主，知道有新界朋友嚟見工，無論公司喺邊我都會請。因為經過住新界嘅磨練，呢位員工仲有咩克服唔到？ 你話OT辛苦，份工要成日企，有咩辛苦得過由7點45分企到8點45分而駕車仲不斷搖嚟搖去，個腳力已經升到S級。
2／讓座係人生決定
有時為左一個位， 可以由天水圍搭返兩個站入屯門再由屯門搭返出紅磡，等等，希望大家唔好叻唔切，西鐵既兩個站，同地鐵既兩個站，係唔同既。果四個站既犧牲，唔係咁易架，所以有人提倡讓座，為左呢個位付出左好多㗎！
3／請好好珍惜我
當住九龍、港島嘅朋友返到屋企沖晒涼上埋床，住新界西嘅朋友可能仍然喺美孚或者尖東行緊果條為競步賽而設嘅走廊，亦可能喺大欖隧道架巴士入面企緊。若果有呢類朋友，你嘗試約佢喺銅鑼灣或者旺角食飯，而佢又成日唔參與或者甩底，應承我，體諒佢，因為只要你真係入過屯元天，你就會體會到果份孤獨。
bottom of page